Artur Simonyan26 Mar 2022

Ամենօրյա խոսք, մարտ 26

Դու քո աչքի առջև իմաստուն մի՛ եղիր, վախեցի՛ր Տիրոջից և հեռացիր չարից: Սա առողջություն կլինի քո մարմնի համար և պարարտություն քո ոսկորներին:

Առակաց 3.7,8

Աստված է ստեղծել մարդուն, և Նա լավ գիտի, թե մարդն ինչ կարիքներ ունի: Օրինակ՝ Աստվածաշնչում բազմիցս շեշտադրվում է կերակուրի ճիշտ ընտրության կարևորությունը: Այսօր ես ավելի ու ավելի եմ համոզվում, որ մեր առողջությունը շատ անգամ կախված է ճիշտ ապրելակերպից: Ճիշտ սնվելու դեպքում կերակուրը նույնիսկ նպաստում է տարբեր հիվանդությունների բուժմանը:

Առողջության պահպանման այլ ճանապարհներ էլ կան: Սովորաբար, տարիքի հետ հիվանդություններն ու ոսկրացավերն ավելանում են: Բայց Աստվածաշունչը խոսում է առողջ մարմնի և պարարտ ոսկրերի մասին, ինչը նշանակում է, որ մենք կարող ենք միշտ առողջ լինել: Պարզապես դրա համար նախապայմաններ կան:

Նախևառաջ` Աստծո Խոսքն ասում է. «Դու քո աչքի առջև իմաստուն մի՛ եղիր», այսինքն՝ մի՛ կարծիր, թե ամեն բան գիտես, այլ ամեն ինչում վստահի՛ր Տիրոջը: Մի՛ մտածիր, թե կանչված ես՝ միայն ուրիշներին սովորեցնելու, այլ հիշի՛ր, որ ինքդ էլ ուրիշներից սովորելու բան ունես: Այնուհետև գրված է. «Տիրոջից վախեցի՛ր ու չարությունից ե՛տ քաշվիր»:

Հպարտությունից հրաժարվելը, Տիրոջից վախենալը և չարից հեռանալը մեր մարմնին առողջություն և ոսկրերին պարարտություն կբերեն:

Սիրելի՛ս, միգուցե քո գործերը չար են, և դու գիտես, որ դա Տիրոջը հաճելի չէ: Այսօր ես քեզ կոչ եմ անում՝ ետ քաշվելու չար գործերից, որոնք տարբեր հիվանդությունների պատճառ կարող են դառնալ: Աստծուց վախեցի՛ր և քո աչքի առջև իմաստուն մի՛ եղիր:

Եկեք ամեն մեկս վերցնենք այսօրվա խոսքը և քայլենք Տիրոջ ճանապարհներով: Ամե՛ն:

Denne episoden er hentet fra en åpen RSS-feed og er ikke publisert av Podme. Den kan derfor inneholde annonser.